【盘房来料】人仔受压中港两地股市齐仆直

浏览量:605 点赞:418 收藏:500 2020-06-13

【盘房来料】人仔受压中港两地股市齐仆直放大图片

上周五中国突向700亿美元美国进口商品加徵关税,作为对美国作出嘅反制措施,不过侵侵一向都唔係省油嘅灯,转过头即向中国还拖,中美贸易战再度激化,更有分析员担心中美「反枱」,步入冷战期,触发全球熊市终极一插。呢一插要几长时间,呢一插要几深,阿Man真係好难预测,中美双方係咪完全无弯转,将会成为后市焦点。

恒指裂口低开857点,甫开市已失守二万六及10日线(约25828),之后最多跌930点,低见25249点,为8月15日以嚟低位,其后跌幅收窄至672点,见半日高位25506点。恒指中午报收25447点,跌731点;国指中午报收9925点,跌269点,两者跌幅皆超过2%。

中美贸易战加剧,人民币一泻如注,今早离岸人仔兑美元曾跌至7.1926,创历史新低,兑每百港元跌至91.4元。自从阿爷曾放风,表示七算并唔係一个乜嘢要坚守嘅目标,当时阿Man已表示,人民币穿七指日可待,问题係贬值速度会有几快,幅度会有几深,由于中美关係急速恶化,估计未来几日人仔汇率低处未算低,大家要有心理準备。

人仔瀡滑梯,内地股市当然脚软,当中以金融股沽压较为显着,事实上面对人仔贬值,内地企业违约无可避免地发生,而去年中央严打资产管理贷款,亦收紧信贷,令唔少公司出现结构性贷款违约,目前正步入恶性循环,企业唔够现金流还债,估计违约个案将有增无减。最好笑係面对咁嘅情况,中国商务部研究院对外贸易研究所所长,竟然表示「贸易战打到现在,对中国来说是渐入佳境」,可以话係「到了最舒服的阶段」,违约违到舒服,真係闻所未闻。

虽然大市插水,大部份重磅蓝筹股都难免一跌,但医药股表现硬朗,阿Man爱股中生製药(01177)更逆市创逾一年新高,半日逆市升2%。之前阿Man表示有货喺手以10元作为止赚目标,走势唔变样继续持有,果然係强者愈强,不过要有心理準备大市继续一路向西的话,再强嘅股份亦难免有被沽售嘅一日。

相反以美国市场为主嘅万洲(00288),中美贸易关係急转直下,其前景可说再度蒙上阴影,半日跌7.3%,众多蓝筹股中排行第尾,睇嚟呢期万洲易跌难升,连反弹力度亦受限制。除咗万洲之外,贸易战敏感股份瑞声(02018)跟舜宇(02382)同样属高危股份,虽然后者已重拾红底股身份,但贸易战持续,红底股身份随时得而复失,短期两股都係避之则吉。

个股方面,业绩大幅改善嘅美团点评(03690)逆市升近7%,股价更于今日跌市中创上市新高,不过都係嗰句,业绩改善唔等于有钱赚,美团炒到呢个位仲值唔值得追,似乎真係要谂谂。

麦狄文
(徐狄怡‧证监会持牌人)

上一篇: 下一篇:

相关推荐